အလံနီလက်ကျန် အမျိုးသား နှစ်ဦးနှင့် အမျိုးသမီးနှစ်ဦး မြန်မာနယ်စပ်တွင် အထူး ဒုက္ခရောက်လျှက်ရှိ

တော်လှန်ရေးသမားများ ထိုသူတို့ ၏စိတ်ဓါတ် ကြံ့ခိုင်မှူကို အတုယူကြရန်

8/2/2009

ဘင်္ဂလာဒေခ်ျ့နိုင်ငံ စစ်တကောင်းတောင်တန်းနယ် အင်းသုံးဆယ် ကျေးရွာအနီးတွင် တောင်ယာစိုက်ပျိုးပြီး အသက်မွေး ၀မ်းကျောင်း ပြုနေသူ အလံနီလက်ကျန် အမျိုးသား (၂)ဦးနှင့် အမျိုးသမီး (၂) ဦးမှာ ယခုအခါ အခက်အခဲပေါင်းစုံနှင့် ရင်ဆိုင်နေကြရ သည်ဟု သတင်းရရှိသည်။

အင်သုံးဆယ် ဆရာတော်မှ “အသက်အရွယ် အလွန်ကြီးရင့် နေတဲ့အတွက် မြန်မာ ပြည်ကို ပြန်သွားပြီး အေးအေးဆေးဆေးပြန်နေဖို့ ပြောပေမယ့် သူတို့ကလက်မခံဘူး။ ခုလို တသက်လုံး တော်လှန်ရေးလုပ်လာပြီးမှ သေမယ့်အချိန်နီးမှ လက်နက်ချတဲ့ အလုပ်တော့မလုပ်ချင်တော့ဘူးဆိုပီး တောထဲမှာ နေထိုင်နေကြတာ ဖြစ်ပါတယ်။ ခုလို မိုးတွင်းကာလမှာဆိုရင် သူတို့တွေ အခြေအနေက ပိုမိုဆိုးရွားပြီး စားဝတ်နေရေး အပြင် ဆေးဝါးမရှိတာတွေနဲ့ ရင်ဆိုင်ကြုံတွေ့နေကြရပါတယ်။ အသက်အရွယ်လည်း တော်တော်ကြီးရင့် နေတဲ့အတွက် အခက်အခဲတွေကတော့ အများကြီးရှိနေပါတယ် ” ဟု နိရဉ္စရာသို့ ပြောသည်။
သူတို့ ၄ ဦးတွင် သုံးဦးမှာ ဗမာလူမျိုးများ ဖြစ်ကြပြီး တဦးမှာ ချင်းအမျိုးသမီး ဖြစ်သည်။

“သူတို့ရဲ့ခေါင်းဆောင် ဦးအောင်နိုင် ဆင်းနှင်းပြီး လွန်ခဲ့တဲ့နှစ်က သေဆုံးသွား တဲ့နောက် အခုနောက်ဆုံးကျန်နေခဲ့တဲ့သူ ၄ ဦးကတော့ ဦးစံသိန်း၊ ဦးချစ်ပုံ၊ ဒေါ်ဝင်းမေ ( ရဲနီ သော်တာဇနီး) နှင့် ဒေါ်မေပုတို့ ဖြစ်ကြပါတယ် ” ဟု ဆရာတော်က ပြောသည်။

သူတို့မှာ ရဲနီသော်တာနှင့်အတူ မဆလအစိုးရမှ ရခိုင်ပြည်နယ်ကို ဖြတ်လေးဖြတ်ဖြင့် စစ်ဆင်ရေးလုပ်စဉ် ၁၉၈၀ ၀န်းကျင်က ဘင်္ဂလာဒေခ်ျ့ကို ထွက်ပြေး တိမ်းရှောင်လာ ခဲ့ကြသူများ ဖြစ်သည်။

အဆိုပါ အလံနီပါတီဝင်များမှာ သခင်စိုးလက်နက်ချသွားခဲ့သော်လည်း လက်နက် မချဘဲ ရခိုင်ရိုးမတွင် ကျန်ရှိနေခဲ့သူများ ဖြစ်ပြီး မြန်မာနိုင်ငံ လွတ်လပ်ရေး ရပြီးစ ကတည်းက တော်လှန်ရေး လုပ်လာသူများ ဖြစ်ကြသည်ဟု သိရသည်။

ဘင်္ဂင်္လာဒေခ်ျ့တွင် ရောက်ရှိစဉ်က အင်အား ၃၀ ခန့်သာ ပါရှိလာခဲ့ပြီး နောက်ပိုင်းတွင် ဦးသော်တာအပါအ၀င် ခေါင်းဆောင်များမှာ အသက်အရွယ် ကြီးရင့်လာသဖြင့် သေဆုံး ကုန်ပြီး ယခုနောက်ဆုံး အဖွဲ့ဝင် ၄ ဦးကျန်နေခဲ့ခြင်း ဖြစ်သည်။

ရဲနီသော်တာမှာ ကော့ဘဇားမြို့တွင် ရုတ်တရက် ၁၉၉၄ ခုနှစ်က ကွယ်လွန်အနိစ္စ ရောက်သွားခဲ့သည်။ ရန်သူထံမှ လက်နက်မချဘဲ သေသည်အထိ ယုံကြည်ချက်ကို ခိုင်မာစွာဆုတ်ကိုင်ပြီး တော်လှန်တိုက်ပွဲဝင်သွားသူ တဦးဖြစ်သဖြင့် ရဲနီသော်တာကို လေးစားသော ရခိုင်တော်လှန်ရေးသမားများက ကော့ဘဇားမြို့ သင်္ချိုင်းတွင် အုတ်ဂူ ငယ်လေးတခု ပြုလုပ်ပြီး ဂုဏ်ပြု ထားသည်ဟု သိရသည်။

Posted by Thaw Thi Kho