ဆင်ဖြူမတစီး ထပ်ပေါ်ပြန်

ခိုင်စု | ကြာသပတေးနေ့၊ စက်တင်ဘာလ ၂၃ ရက် ၂၀၁၀ ခုနှစ် ၂၀ နာရီ ၂၆ မိနစ် .
နယူးဒေလီ (မဇ္ဈိမ)။ ။ ရခိုင်ပြည်နယ် မောင်တောမြို့မြောက်ဖက်တွင် ဆင်ဖြူမတစီး ထပ်တွေ့သဖြင့် အနောက်ပိုင်းတိုင်း စစ်ဌာနချုပ်တိုင်းမှူး ဗိုလ်မှူးချုပ် စိုးသိန်းနှင့် စစ်ဘက်အရပ်ဘက် အာဏာပိုင်များ ယနေ့ပူးပေါင်းဖမ်းဆီးကြသည်။

ယခုလ ၂ဝ ရက်က ဆင်ဖြူမ ပါသော ဆင် ၅ ကောင်အုပ်ကို မောင်တောမြောက်ဘက် ၂၇ မိုင်ကွာ မင်္ဂလာညွန့်နှင့် ကြိမ်ချောင်းရွာအကြား တွေ့ရှိပြီးနောက် နယ်စပ်ဒေသ ကွပ်ကဲရေးနှင့် စစ်ဆေးရေးဌာန (နစက) ၊ ဒေသခံ စစ်တပ်၊ မြို့နယ် သစ်တောဦးစီးဌာနနှင့် မြန်မာ့သစ်လုပ်ငန်းမှ ဝန်ထမ်းများဖြင့် ဝိုင်းဝန်းဖမ်းဆီးခဲ့သည်။

“ဒီနေ့ နေ့လယ် ၁၂ နာရီလောက်မှာ ဖမ်းမိပြီ။ မနေ့က နေပြည်တော် ကာကွယ်ရေးဝန်ကြီးဌာနက ဒုတိယဗိုလ်ချုပ်ကြီးကိုကို ရဟတ်ယာဉ်နဲ့ လာတယ်။ တိုင်းမှူးကတော့ ကြိုပြီး ရောက်နေတာပေါ့။ စစ်တပ်နဲ့ ဝိုင်းတယ်။ မနေ့ညကတော့ ဆင်ယဉ် ၄ ကောင် ပို့ခဲ့တယ်။ သူတို့နဲ့ ဝိုင်းညှပ်ဖမ်းဖို့ပေါ့” ဟု မောင်တော မယကရုံးနှင့် နီးစပ်သူက မဇ္ဈိမကို ပြောသည်။ သစ်တောဦးစီးဌာန ခန့်မှန်းချက်အရ ဆင်ဖြူမမှာ အသက် ၂၉ နှစ်ခန့် ရှိသည်ဟု ဆိုသည်။

မောင်တောခရိုင် ခယကရုံး တာဝန်ရှိသူတဦးကမူ ကြိမ်ချောင်းရွာ အထက်ပိုင်းတွင် ဆင်ဖြူတော် တွေ့ထားသည်ဟုသာ ဆိုပြီး အသေးစိတ် ပြောရန် ငြင်းဆိုသည်။

ပြီးခဲ့သည့် ဇွန်လ ၂၆ ရက်က မောင်တောမြို့နယ် ဖားဝပ်ချောင်းရွာမှ ၃၈ နှစ်အရွယ် ဆင်ဖြူမ တစီး နောက်ဆုံး ဖမ်းမိခဲ့သေးသည်။ ယင်းဆင်ဖြူမကို ဘဒ္ဒဝတီ အမည်ပေးကာ နေပြည်တော် ဥပ္ပါတသန္တိ စေတီ ဝတ္တကမြေမှ အဆောင်၌ ထားသည်။

ထို့ပြင် ရသေ့တောင်မြို့နယ် စေတီပြင်ရွာအနီး ၂ဝဝဝ ပြည့်နှစ်က ဆင်ဖြူအထီး တစီး၊ မောင်တောမြို့နယ်အတွင်း ၂ဝဝ၂ က ဆင်ဖြူမကြီး တစီးနှင့် ဆင်ဖြူမငယ် တစီး ဖမ်းမိခဲ့ဖူးသည်။

မယူတောင်တန်းမှ ဖမ်းမိသည့် ဆင်ဖြူကို ဖြုတ်ချခံလိုက်ရသော ဝန်ကြီးချုပ်ဟောင်း ဗိုလ်ချုပ်ကြီးခင်ညွန့်က အင်းစိန်မင်းဓမ္မကုန်းတော်တွင် ရတနာဆင်ဖြူတော် အမည်ရှိ ဥယျာဉ်တခု ဆောက်ပေးကာ ထားခဲ့သည်။

ကွယ်လွန်သူ သမိုင်းပညာရှင် ဒေါက်တာသန်းထွန်းကမူ ဆင်ကို ဖြူသည်ဖြစ်စေ၊ မည်းသည်ဖြစ်စေ တိရစ္ဆာန်ပင်ဖြစ်သဖြင့် မရှိခိုးအပ်ကြောင်း ပြောဆိုခဲ့ဖူးသည်။