စစ်အစိုးရက အရှေ့အလယ်ပိုင်း စစ်ဌာနချုပ်လို့ အမည်ရတဲ့ စစ်ဌာနချုပ်အသစ်တခုကို ထပ်မံဖွင့်လှစ်လိုက်တယ်လို့ ဧရာဝတီသတင်းဝက်ဆိုက်ဘ်မှာ ဖတ်ရှူရပါတယ်။ အဲဒီ စစ်ဌာနချုပ်ကို ရှမ်းပြည်တောင်ပိုင်းမှာ အခြေစိုက်မှာဖြစ်ပြီး တိုင်းမှူးအဖြစ် ဗိုလ်မှူးချုပ် မြထွန်းဦးအား ခန့်အပ်လိုက်တယ်လို့လည်း ဖော်ပြထားပါတယ်။
(၀ဲမှယာ-ဗိုလ်မှူးထော့လေ့ (KNDO), ဖူးထိန်မောင်၊ ဒေါက်တာဖောဖော (ငြိမ်းချမ်းရေးပွဲစား)၊ ဗိုလ်မှူးချုပ်မြထွန်းဦးပုံ။
စစ်ဌာနချုပ်သစ်ရဲ့ တိုင်းမှူးမဖြစ်ခင်က ဗိုလ်မှူးချုပ်မြထွန်းဦးဟာ စစ်ဖက်ဆိုင်ရာ လုံခြုံရေး (စရဖ)မှာ တာဝန်ထမ်းဆောင်ခဲ့သူပါ။ သူ့ရဲ့ ဆရာကတော့ (စရဖ)က ဗိုလ်ချုပ်ရဲမြင့်ပဲ ဖြစ်ပါတယ်။ (စရဖ)မှာ တာဝန်ထမ်းဆောင်တဲ့အချိန်က မြထွန်းဦးဟာ ကေအဲန်ယူလက်အောက်က တပ်မဟာ တပ်ရင်းတွေကို အစိတ်စိတ်အမွာမွာ ဖြစ်အောင် ဖဲ့ထုတ်စည်းရုံးရာမှာ အဓိကနေရာကနေ ပါဝင်ဦးဆောင်ခဲ့သူပါ။
အဲဒီလိုလှုပ်ရှားရာမှာ ကေအဲန်ယူထဲက အင်အား အကြီးမားဆုံး တပ်မဟာတခုဖြစ်တဲ့ တပ်မဟာ၇ကို အရင်ဆုံး ချည်းကပ်ခဲ့ပါတယ်။ သူ့ရဲ့အနီးကပ်ဆုံး နောက်လိုက်ကတော့ တပ်မဟာ ၆လက်အောက် တပ်ရင်း ၁၈ကို စည်းရုံးဖဲ့ထုတ်ခဲ့တဲ့ ဗိုလ်မှူး မင်းချစ်ဦးပဲ ဖြစ်ပါတယ်။ အဲဒီစည်းရုံးဖဲ့ထုတ်မှုကတော့ မအောင်မမြင်ဖြစ်ပြီး နောက်ဆုံး ဗိုလ်ကြည်လင်း လုပ်ကြံခံခဲ့ရပါတယ်။
မြထွန်းဦးဟာ ဖူးထိန်မောင်ကို စည်းရုံးဖို့အတွက် ငြိမ်းချမ်းရေး ပွဲစားတွေလို့ အများက သမုတ်ကြတဲ့ ပြည်တွင်းက သြဇာရှိ ကရင်အမျိုးသားတွေနဲ့ နယ်စပ်မှာ အခြေချလှုပ်ရှားနေတဲ့ တချိန်က ကရင်တော်လှန်ရေးမှာ အုတ်ရောရော ကျောက်ရောရောနဲ့ ပါဝင်သော်လည်း ကိုယ်ကျိုးအတွက် အခွင့်အရေးသမား ဆိုတဲ့ လူတွေတချို့ကို အသုံးချခဲ့ပါတယ်။ နာမယ်တွေကိုတော့ မဖော်ပြတော့ပါဘူး။
တပ်မဟာ ၇ကို စည်းရုံးဖဲ့ထုတ်တဲ့ နေရာမှာ ကေအဲန်ယူဗဟိုနဲ့ ရန်စတိုက်ပေးပြီး အက်ကြောင်းတွေ ဖြစ်အောင် ဖန်တီးခဲ့ပါတယ်။ နောက်ဆုံး ၄င်းရဲ့ စည်းရုံးရေးဟာ တော်တော်လေး အောင်မြင်မှုတွေ ရှိလာပြီးတော့ တပ်မဟာ ၇မှူး ဖူးထိန်မောင်ဆီကို မြထွန်းဦးနဲ့ အပေါင်းအပါတွေ တံခါးမရှိ ဓါးမရှိ ၀င်ထွက်လာနိုင်ခဲ့တဲ့ အပြင် ဗိုလ်ချုပ်မြရဲ့ ဈာပနာအခမ်းအနားကိုလည်း (စရဖ) လွမ်းသူ့ပန်းခွေကိုင်ပြီး တက်ရောက်နိုင်ခဲ့ပါတယ်။
အဲဒီအချိန်က မြထွန်းဦးကို ဘယ်သူတွေက လှိုက်လှိုက်လှဲလှဲနဲ့ ကြိုဆိုနေရာတွေ ပေးနေကြလဲဆိုတာ ဈာပန တက်ရောက်ခဲ့သူတိုင်း သိရှိနိုင်မှာ ဖြစ်ပါတယ်။ နောက်ဆုံးမှာတော့ တပ်မဟာရမှူး ဖူးထိန်မောင်နဲ့ အပေါင်းအပါတချို့ဟာ ကေအဲန်ယူကြီး တခုလုံးကို ကျောခိုင်းပြီး နအဖနဲ့ ပူးပေါင်းသွားတဲ့အထိ မြထွန်းဦး စည်းရုံးသွားနိုင်ခဲ့ပါတယ်။ ဖူးထိန်မောင်ကို စည်းရုံးနိုင်တော့ သူ့လက်အောက်ခံ တပ်တွေ အားလုံး လိုက်ပါလာမယ်လို့ မြထွန်းဦး တွက်ဆထားပါတယ်။
သို့ပေမယ့်လည်း မြထွန်းဦး မျှော်လင့်ထားသလို တပ်မဟာ ၇လက်အောက်ခံတပ် ရင်း ၇ရင်းစလုံးနဲ့ ဗဟိုအထူးတပ်ရင်းတွေ ဖူးထိန်မောင် လိုက်ပါမသွားပါဘူး။ အဲဒီအတွက် နအဖစစ်ခေါင်းဆောင်တွေရဲ့ ကြိမ်းမောင်းမှုကိုလည်း မြထွန်းဦးတယောက် ခံခဲ့ရတယ်လို့ သတင်းထွက်ပေါ်ခဲ့ပါသေးတယ်။ ဘယ်လိုပဲဖြစ်ဖြစ် အထင်ကရ ကရင့်တော်လှန်ရေး သမားကြီးတယောက်ကို စည်းရုံးသွားနိုင်ခဲ့တာကတော့ တော်ရုံတန်ရုံ အလုပ်တခုတော့ မဟုတ်ပါဘူး။
တဖက်မှာလည်း မြထွန်းဦးနဲ့ ဖူးထိန်မောင်ဟာ ပုဂ္ဂိုလ်ရေးအရ အလွန်ရင်းနှီးကြသလို ဖူးထိန်မောင် အားအထားရဆုံး သူ့သားမက် ဗိုလ်လယ်မှူး(လုပ်ကြံမှုကြောင့် သေဆုံး)နဲ့လည်း အလွန်ရင်းနှီးကြပါတယ်။ မြထွန်းဦးဟာ အစည်းအဝေးတိုင်း၊ တွေ့ဆုံကြတဲ့အချိန်တိုင်းမှာ ဖူးထိန်မောင်ရဲ့ မွေးစားသားဖြစ်ကြောင်း ဂုဏ်ယူစွာနဲ့ အမြဲတမ်းထုတ်ဖော် ပြောဆိုလေ့ရှိပါတယ်။ နောက်ဆုံး ဖူးထိန်မောင်ကို နယ်ခြားစောင့်တပ် အသွင်ပြောင်းဖို့ ဖိအားပေးတဲ့အချိန်တိုင်းမှာ မြထွန်းဦးဟာ ဗိုလ်ချုပ်ရဲမြင့်နဲ့အတူ အမြဲတမ်းပါဝင်လေ့ ရှိပါတယ်။ ဒါကတော့ မြထွန်းဦးနဲ့ ဖူးထိန်မောင်တို့ရဲ့ ပတ်သက်ဆက်နွယ်မှုတွေထဲက ကျနော်သိတာလေးကိုပဲ မျှဝေလိုက်တာ ဖြစ်ပါတယ်။
No comments:
Post a Comment