ဝီရ / ၁၀ စက်တင်ဘာ ၂၀၀၉
စစ်အစိုးရတပ်နှင့် ပူးပေါင်းတပ်ဖြစ်သည့် တိုးတက်သောဗုဒ္ဓဘာသာ ကရင်အမျိုးသားတပ်မတော် (ဒီကေဘီအေ) တို့အပြင် ကရင်အမျိုးသား လွတ်မြောက်ရေးတပ်မတော် (ကေအန်အယ်လ်အေ) တို့၏ မြေမြှုပ်မိုင်းထောင်မှုများ ဆက်လက်တည်ရှိ နေသောကြောင့် စစ်ပြေးကရင်ဒုက္ခသည်များ နေရပ်ပြန်ရေးအတွက် ကြီးမားသည့် အဟန့်အတားတရပ် ဖြစ်နေသည်။
ကရင်လူ့အခွင့်အရေးအဖွဲ့ (KHRG) မှ Field Assistant ကိုအယ်ဘတ်က “ဒီကေဘီအေတို့ဘက်က မိုင်းထောင်နေတာက မြေပုံနဲ့ အတိအကျ သတ်မှတ်ထားတာ မရှိဘူး။ Landmines (မြေမြှုပ်မိုင်း) တွေ ထပ်ထောင်နေတဲ့ကိစ္စက ဒုက္ခသည်တွေ နေရပ်ပြန်ဖို့အတွက် အန္တရာယ် များလွန်းနေတယ်။ ကေအန်အယ်လ်အေဘက်ကရော နှစ်ဘက်စလုံးက မထင်မှတ်ထားတဲ့ နေရာတွေမှာ Landmines တွေ အသုံးပြုထားကြတာ ဖြစ်တယ်” ဟု ခေတ်ပြိုင်သို့ ပြောသည်။
ဇွန်လဆန်းပိုင်းမှစ၍ တပ်မဟာ (၇) ထိုးစစ်ကြောင့် နေရပ်စွန့်ခွာပြီး ထိုင်းဘက်ကမ်း ထာ့ဆောင်ရမ်းမြို့နယ်သို့ ထွက်ပြေးခုိုလှုံလာသည့် ကရင်စစ်ပြေးဒုက္ခသည် (၅) ထောင်ခန့်အား ထိုင်းအာဏာပိုင်နှင့် ဒုက္ခသည်ကူညီရေးအဖွဲ့တို့၏ သဘောတူညီချက်အရ မိုးရာသီ ကုန်ဆုံးချိန်အထိသာ ထိုင်းဘက်ကမ်းတွင် ဆက်လက်ထားရှိမည်ဟု သိရသည်။
၂၀၀၉ ခု စက်တင်ဘာ (၈) ရက်၌ KHRG မှ ထုတ်ပြန်လိုက်သည့် မြေမြှုပ်မိုင်းနှင့် ပတ်သက်သည့် “Exploitative Abuse” အစီရင်ခံစာတွင် ကေအန်အယ်လ်အေက ၎င်းတို့၏ တပ်မဟာ (၇) ကျရှုံးပြီးနောက် ပြောက်ကျားစစ်ဆင်ရေး ဆက်လက် ဆင်နွှဲရာတွင် တပ်စခန်း၏ အပြင်ဘက်၌ မြေမြှုပ်မိုင်း တပ်ဆင်ထားမှုများ ရှိသည်ဟု ဆိုထားသည်။
ဆက်လက်၍ “ဒုက္ခသည်တွေကိုယ်တိုင်က နေရပ်ပြန်ချင်ကြပါတယ်။ မြန်မာပြည်ဘက်ကမ်းမှာ သူတို့လယ်တွေ၊ ခြံတွေ ရှိတာကိုး၊ ဒါပေမယ့် ဒီ Landmine ထောင်ထားတဲ့ကိစ္စ၊ ကျေးရွာပြန်ရောက်ရင် ဒီကေဘီအေက အတင်းအဓမ္မ လုပ်အားပေး ခိုင်းစေတာတို့၊ ပေါ်တာဆွဲတာတို့နဲ့ စစ်သားအသစ် စုဆောင်းတာ ခံရမှာ ကြောက်နေကြတယ်။ ဒါကြောင့် သူတို့ကို နေရပ်ပြန်ပို့ဖို့ ဆွေးနွေးကြရင် ထိုင်းအာဏာပိုင်နဲ့ အကူအညီပေးတဲ့အဖွဲ့တွေရဲ့ ဆုံးဖြတ်ချက်ထက် ဒီစစ်ပြေးဒုက္ခသည်တွေရဲ့ စိုးရိမ်ရတဲ့ အခြေအနေကို ထည့်သွင်းစဉ်းစားသင့်တယ်။ ဒုက္ခသည်အရေး ပေါ်လစီအသစ်တွေထုတ်ရင် ဒီဒုက္ခသည်တွေရဲ့ ခံစားချက်တွေ၊ အမြင်သဘောထားတွေကိုလည်း ထပ်စဉ်းစားသင့်တယ်လို့ ကျနော်တို့က အာဏာပိုင်တွေကို တောင်းဆိုထားတယ်” ဟု ကိုအယ်ဘတ်က ပြောသည်။
ထိုင်းနယ်စပ် ဒုက္ခသည်စခန်းများမှ နေရပ်ပြန်သည့် လမ်းခရီးများတွင်သာမက လုပ်ငန်းခွင်ရှိရာ လယ်ယာခြံမြေများတွင်လည်း မြေမြှုပ်မိုင်း အန္တရာယ်ရှိသဖြင့် နေရပ်ပြန်မည့် ရွာသားများအား ဒီကေဘီအေတို့က မိုင်းရှင်းလင်းရေးအတွက် Human Minesweepers အနေဖြင့် အသုံးပြုမည်ကို ကရင်လူ့အခွင့်အရေးအဖွဲ့က စိုးရိမ်လျက်ရှိသည်။
“ဒီကေဘီအေတို့က သူတို့စစ်သားတွေအတွက် စည်းမျဉ်းစည်းကမ်းတွေ မရှိဘူးလို့ ကျနော်ထင်တယ်။ ကျနော်တို့ရွာသားတွေကို တိရစ္ဆာန်တွေလို ဆက်ဆံတယ်။ ရွာသားတွေကို တိရစ္ဆာန်တွေသတ်သလို သတ်နေတယ်။ လူတယောက်ကို ဘာမှမမေးမြန်းဘဲ ဘာအကြောင်းပြချက်မှမရှိဘဲနဲ့ သူတို့သတ်တယ်” ဟု သြဂုတ်လအတွင်း ထိုင်းဘက်ကမ်းသို့ ထပ်မံရောက်ရှိလာသည့် စစ်ပြေးဒုက္ခသည်များအနက် အသက် (၄၁) နှစ်ရှိ ရွာသားတဦး၏ပြောကြားချက်ကို အစီရင်ခံစာတွင် ဖော်ပြထားသည်။
မြန်မာစစ်တပ်နှင့် ဒီကေဘီအေ တပ်ဖွဲ့တို့က ပေါ်တာဆွဲခြင်း၊ စစ်သားအသစ် စုဆောင်းခြင်းတို့ကြောင့်လည်း စစ်ပြေးဒုက္ခသည် သစ်များ ဆက်လက်ရောက်ရှိနေခြင်းဖြစ်သည်။
မြေမြှုပ်မိုင်း ရှင်းလင်းရေး တာဝန်ယူထားသည့် ဒီကေဘီအေ အရာရှိတဦးက စစ်အစိုးရနှင့် ဒီကေဘီအေ ပူးပေါင်းတပ်တို့၏ လက်အောက် ကျရောက်ခဲ့သည့် တပ်မဟာ (၇) စခန်း ပတ်ဝန်းကျင်တွင် ကေအန်အယ်လ်အေက မြေမြှုပ်မိုင်း အလုံးပေါင်း (၃,၀၀၀) ခန့် ထောင်ထားသည်ဟု ခန့်မှန်းပြောဆိုသည်။
THE NEJ မှကူးယူဖေါ်ပြသည်။
No comments:
Post a Comment