ငြိမ်းဝေ
သောကြာနေ့၊ နိုဝင်ဘာလ 06 ရက် 2009 ခုနှစ် 16 နာရီ 08 မိနစ်
(က)
၁၉၉၅ ခုနှစ်၊ ဖေဖော်ဝါရီလ ၂ ရက်၊ ဖွေးပေါလူရွာ ယာယီစစ်ပြေးစခန်း။ (မာနယ်ပလော တော်လှန်ရေး ဌာနချုပ်ကို စစ်အစိုးရနှင့် ဒီကေဘီအေတပ်များ သိမ်းပိုက်ရယူအပြီး ၆ ရက် အကြာ)
ပဟေလူချောင်းထဲကိုဆင်းတော့ ချောင်းထဲတွင် လူသူလေးပါး တိတ်ဆိတ်လျက်ရှိ၏။ လွန်ခဲ့သော ၅ ရက်က ဤနေရာတွင် လူများ ဥဒဟို သွားလာစည်ကားနေခဲ့၏။ မာနယ်ပလောတဝိုက်မှ ထွက်ပြေးတိမ်းရှောင်လာသော စစ်ပြေးဒုက္ခသည် အထောင်အသောင်းမှာ ဤပဟေလူချောင်းဘေးတွင် အထုပ်အပိုး ကိုယ်စီနှင့် သွားလာနေခဲ့ကြ၏။ ကျနော်သည်ပင်လျှင် ဒီမိုကရက်တစ် မြန်မာ့အသံ အသံဖမ်းစက်များ၊ ရုံးပိုင်ပစ္စည်းများနှင့် ဤချောင်းဘေး သောင်ခုံပေါ်တွင် တညအိပ်ခဲ့၏။ ထိုမှတဆင့် ဖွေးပေါလူရွာသို့ ခရီးဆက်ခဲ့ခြင်း ဖြစ်သည်။
“မာနယ်ပလောမှာ ဒီကေဘီအေ အလံတွေ ထောင်ထားတယ်”
ကျနော်ကြားရသည့်သတင်းမှာ ပါးစပ်သတင်းဖြစ်သည့်တိုင် ဤသတင်းက ကျနော့်ကို အကြီးအကျယ် ဖမ်းစားထားခဲ့၏။ နောက်ဆုံးတော့ မာနယ်ပလောကို သောင်ရင်းမြစ်၏ ဒီဘက်ကမ်းမှတဆင့် ဓာတ်ပုံချောင်းရိုက်ရန် ကျနော် ဆုံးဖြတ်လိုက်သည်။
မာနယ်ပလောကို အလွယ်တကူ အပေါ်ဆီးမှ ဓာတ်ပုံချောင်းရိုက်ဖို့ဆိုလျှင် မာနယ်ပလောနှင့် မျက်နှာချင်းဆိုင် သောင်ရင်းမြစ်တဖက်ကမ်း ထိုင်းနိုင်ငံဘက်မှ ရိုက်မှသာဖြစ်မည်ကို ကျနော် သိသည်။ ပဟေလူချောင်းကိုကူးကာ ပဟေလူရွာ နောက်ကျောဘက် တောင်ကြောပေါ်တက်လျှင် ကျနော့်အတွက် အဆင်ပြေနိုင်သည်ဟူ၍သာ ခန့်မှန်းပြီး သိထား၏။ သို့သော် ထိုနေရာသို့ ပြန်သွားလို့ရသည့် လမ်းကို ကျနော် မသိ။ ထိုလမ်းကို ကျနော် မကျွမ်းကျင်။ မာနယ်ပလောမှ ထွက်ပြေးတိမ်းရှောင်လာစဉ်က ကျနော်က ရေလမ်းအတ်ိုင်း သောင်ရင်းမြစ်အတွင်း စီးဝင်သည့် ပဟေလူချောင်းအတိုင်း စက်လှေနှင့် ဆန်တက်လာခဲ့ခြင်းသာ ဖြစ်၏။ ထို့ကြောင့် ပဟေလူနောက်ကျောဘက် တောင်ကြောအတိုင်း ဆင်းလာသည့်လမ်းကို ကျနော် မလာခဲ့ရတော့။ အခုတော့ ထိုတောင်ကြောပေါ်တက်ပြီးမှ မာနယ်ပလောဆီ ပြန်သွားရမည် ရှိသောအခါ ကျနော့်မှာ အခက်တွေ့ရတော့၏။
မာနယ်ပလော၏ နောက်ဆုံးသတင်း ကြားကြားချင်း ကျနော့်ကို လမ်းပြခေါ်ဆောင်ပေးနိုင်မည့် လူကို ကျနော် အပူတပြင်း ရှာသည်။ သို့သော် လူတကာ လိုက်မေးလို့ကလည်း မဖြစ်။ လုံခြုံရေးက အရေးကြီး၏။ ကံအားလျော်စွာ ပလောင်အဖွဲ့မှ ‘မိုင်အိုက်ပုံး‛ က ကျနော့်ကို အကူအညီပေးမည်ဟု ဆိုလာခဲ့၏။ ကျနော့် ရည်ရွယ်ချက်ကို သူလည်း စိတ်ဝင်စားသည်ဟု ဆို၏။ သို့နှင့် သူနှင့်ကျနော် မနက်ခင်း ၈ နာရီတွင် ထမင်းအဝစားကာ ခရီးထွက်ခဲ့ကြ၏။
ကျနော်တို့နှစ်ယောက် ပဟေလူချောင်းထဲကိုရောက်တော့ ချောင်းထဲတွင် လူသူတိတ်ဆိတ်လျက် ရှိ၏။ လူသူစွန့်ခွာသွားပြီဖြစ်သည့် ပဟေလူရွာအိမ်တချို့ ကြားမှဖြတ်ကာ တောင်ကြောပေါ် တက်ကြ၏။ ၁ဝ မိနစ်ခန့် ကြာသည်အထိ လူသွားလမ်းအတိုင်း မဟုတ်ဘဲ သစ်ပင်များ၊ ကျောက်တုံးများကို တွယ်ကာဖက်ကာ တက်လာနေရသဖြင့် ကျနော်က စိတ်မရှည်ချင်တော့။ သို့သော် ‘မိုင်အိုက်ပုံး‛ ရဲ့ စကားက ယုတ္တိရှိနေသည်။ သူက ဤလမ်းခရီးမှာ လျှို့ဝှက်ခရီး ဖြစ်သည်။ ထို့ကြောင့် လျှို့ဝှက်လမ်းကိုသာ ရွေးရမည်ဟု ဆိုထား၏။ ထို့ကြောင့် ကျနော့်မှာ စောဒကမတက်နိုင်ဘဲ ပင်ပမ်းကြီးစွာ သူ့နောက်မှ လိုက်နေခဲ့ရ၏။
နာရီဝက်ကျော်ခန့်ရှိတော့ ကျနော် မအောင့်အီးနိုင်တော့။ သစ်ပင်တပင်ကိုမှီကာ နေရာတွင်ပင် ရပ်လိုက်သည်။
‘ဟေ့လူ … ခင်ဗျားလမ်းက မဟုတ်သေးဘူးနဲ့ တူတယ်နော်။ ကျနော်သိထားတာက ဒီပေါ်မှာ လူသွားလမ်း ကောင်းကောင်းတခုတော့ ရှိတယ်ဗျ။ ကျနော်တို့ အဲဒီလမ်းကိုတွေ့မှ မာနယ်ပလောဘက် ကျော်ဆင်းလို့ ရမယ်မို့လား‛
မိုင်အိုက်ပုံးက ကျနော့်ကို မကြည့်ဘဲ ခတ်တွေတွေရပ်ပြီး စဉ်းစားနေ၏။ သူ့ရဲ့ နဝေတိမ်တောင် ဖြစ်နေသည့် အခြေအနေကို ကြည့်ကာ ကျနော် စိတ်ပူသွားရသည်။
‘အင်း … ဟုတ်တော့ ဟုတ်တယ်။ ဒါပေမဲ့ ခုထက်ထိ အဲဒီလမ်းကို မရောက်သေးဘူး ဖြစ်နေတယ်။ ကျနော်က အမြန်ရောက်အောင်ဖြတ်ပြီး တက်လာတာဗျ။ ခုဟာက အမြန်လိုမှ‛
‘ဟာ … ခင်ဗျားကတော့ လုပ်တော့မယ်။ ပြောတုန်းကတော့ ဒီလမ်းကို မျက်စိမှိတ်ပြီးတောင် တက်လို့ရတယ်ဆို။ ခုအတိုင်းဆိုရင် ကျုပ်တို့ နေမစောင်းခင် မာနယ်ပလောဘက်ခြမ်းဆင်းဖို့ အချိန်မီပါဦးမလားဗျာ‛
ကျနော်တို့ နှစ်ယောက် တက်လာလက်စ လမ်းအတိုင်း ဆက်တက်ကြ၏။ ဒီတခါတော့ ကျနော်ကပဲ ရှေ့က ဦးဆောင်ပြီး တက်သည်။ မိုင်အိုက်ပုံးက ဘာမျှမဟတော့။ သူနှင့်ကျနော်က အဖွဲ့အစည်းချင်းသာ မတူပေမယ့် ညီရင်းအကိုတမျှ ရင်းနှီးကြ၏။ ကျနော်တွင်မက ရဲဘော်အားလုံးနီးပါး သူ့ကို ခင်မင်ကြ၏။ အထူးသဖြင့် သူနှင့်ကျနော်က တယောက်နှင့်တယောက် ပြောမနာ ဆိုမနာ။ ထို့ကြောင့် ကျနော်က သူ့ကို တလမ်းလုံး တဗြစ်တောက်တောက် လုပ်လာခဲ့၏။ သူကလည်း မျက်နှာတပြုံးပြုံးနှင့် ကျနော် ပြောသမျှ ငုံ့ခံပြီး လိုက်လာခဲ့၏။
‘ဟော … တွေ့ပြီ။ ဒီလမ်းပဲ … ဒီလမ်းပဲ‛
သူက အောင်နိုင်သူ၏ လေသံမျိုးဖြင့် တောလမ်းလေးပေါ်တက်ပြီး ရပ်သည်။ ပြီးတော့ ကျနော့်ရှေ့မှ ဦးဆောင်ကာ လမ်းအတိုင်း ခတ်ကြွားကြွား ထွက်သွားလေသည်။ လမ်းလေးအတိုင်း ခပ်သွက်သွက် သွားနေရင်းက ပတ်ဝန်းကျင်ကို ဂရုပြုမိသည်။ ကိုယ့်ဇောနှင့်ကိုယ် တောင်ပေါ်တက်လာခဲ့သဖြင့် ပတ်ဝန်းကျင်ကိုပင် မေ့နေခဲ့မိ၏။ အမှန်အားဖြင့် ဤနေရာမှာ ရန်သူနှင့် အနီးဆုံးနေရာဖြစ်၏။ လူသူမရှိတော့သည့် နယ်မြေဖြစ်၏။ ထိုသို့ တွေးမိသည့်အခါကျမှ ကျနော့်မှာ တုန်လှုပ်မိ၏။ သို့သော် ရဲဘော်ကြီး မိုင်အိုက်ပုံးကမူ ထိတ်လန့်ကြောက်ရွံ့သည့် အမူအယာ မရှိ။ ရှေ့က ဦးဆောင်ချီတက်လျက်ရှိသဖြင့် ကျနော့်မှာ အားရှိသွားရ၏။
နာရီဝက်ခန့် လျှောက်လာပြီးသည့်အခါ ကျနော် စိတ်ပူလာရပြန်သည်။ ဒီအချိန်လောက်ဆိုလျှင် မာနယ်ပလောကို ရောက်ဖို့သင့်ပြီဟု တွေးမိသည်။ သည့်ထက် တနာရီခန့် နောက်ကျသွားပါက မာနယ်ပလောကို ဓာတ်ပုံခိုးရိုက်ဖို့ရာ အခက်အခဲရှိနိုင်သည်။ မွန်းလွဲလို့ နေစောင်းလျှင် ကင်မရာကို မာနယ်ပလောဘက် လှမ်းချိန်လို့ မသင့်တော်တော့မှန်း ကျနော် တွေးမိလာသည်။ မာနယ်ပလောတွင် စစ်တပ်များ ရှိနေသည်။ ရန်သူက မာနယ်ပလောကို သိမ်းမိသည်မှာ ရက်ပိုင်းမျှသာ ရှိသေးသည်။ ပြီးတော့ ယခင် မာနယ်ပလော လုံခြုံရေး ကရင်ရဲဘော် အတော်များများမှာ ဒီကေဘီအေ ဘက်သို့ ပါသွားသဖြင့် မာနယ်ပလောနှင့် မျက်နှာချင်းဆိုင် ထိုင်းနိုင်ငံဘက်ကမ်းမှာ လုံခြုံရေးအရ အင်မတန် အရေးကြီးသည့် နေရာဖြစ်သည်ကို မသိမဟုတ် သိကြမည်။
ထို့ကြောင့် ရန်သူက ဒီဘက်ကမ်းတောင်ကြောကို အမြဲမပြတ် စောင့်ကြည့်နေမည်မှာ သေချာသည်။ အကယ်၍ တဖက်က မှန်ပြောင်းနှင့် စောင့်ကြည့်နေစဉ် ကျနော်က ကင်မရာကို ထုတ်ချိန်လိုက်ပါက နေရောင်ကြောင့် ကင်မရာမှန်မှ အလင်းရောင်ပြန်လျှင် ရန်သူက ဧကန်မုချ သေနတ်နှင့် လှမ်းပစ်မည်သာ ဖြစ်သည်။ ကျနော်တို့ နေရာယူရန် စိတ်ကူးထားသည့်နေရာမှာ မာနယ်ပလောဘက်ကမ်းနှင့် လက်နက်ငယ် တကမ်းအကွာတွင်သာ ရှိသည်။ ထို့ကြောင့် မွန်းမလွဲခင် ရည်မှန်းထားသည့် နေရာသို့ ရောက်ဖို့ရန် အချိန်မရှိလောက်အောင် ဖြစ်လာခဲ့သည်။
‘ဟော … ဟိုမှာ တွေ့ပြီ။ ရောက် ရောက် ‛
မိုင်အိုက်ပုံး တအံတသြ ရပ်ကြည့်နေရာကို ကျနော် အမောတကော ပြေးကြည့်သည်။ သူက လက်ညှိုးညွှန်သလို လုပ်ပြီးမှ လက်ကိုပြန် ရုပ်လိုက်၏။ တောင်ခြေအောက်က ရွာကလေးတရွာ။ ကျနော် နေရာတွင်ပင် ကြက်သေသေကာ ရပ်နေမိသည်။
‘ဟား … ဒုက္ခပဲ၊ အဲဒါ မာနယ်ပလော မဖြစ်နိုင်ဘူးလေဗျာ ‛
ကျနော်က သူ့က်ိုတွန်းထိုးကာ လှမ်းမြင်ရသည့် ရွာကလေးကို စိတ်ပျက်စွာကြည့်သည်။
‘ဟုတ်၊ ဟုတ်တယ် ကိုငြိမ်း။ အဲ … အဲဒါ မယ်ပေါထ ပဲ‛
‘ကျုပ်ထင်တယ်၊ စတက်လာကတည်းက ကျုပ်ထင်တယ်။ ခင်ဗျား အစကတည်းက ကိုယ်မကျွမ်းရင် မကျွမ်းဘူးလို့ အမှန်အတိုင်း ပြောပေါ့ဗျ။ အခုတော့‛
‘အခုတော့ မယ်ပေါထပဲလေဗျာ။ မယ်ပေါထရွာတွေ့ရင် မာနယ်ပလောက ပြေးမလွတ်တော့ပါဘူး … ကိုငြိမ်းရ‛
‘ဘာပြေးမလွတ်ရမှာလဲ။ အခုအတိုင်းဆို မာနယ်ပလောကိုတောင် ကျော်လာခဲ့ပြီ။ ခင်ဗျား မယ်ပေါထကို တမင်သွားချင်လို့ ကျုပ်ကို ညာခေါ်လာတာများလား။ မရဘူး ပြန်လှည့်မယ်။ ကျုပ်ကတော့ မာနယ်ပလောမှ မာနယ်ပလောပဲ။ ကြည့်စမ်းဗျာ … ကျုပ်က အကောင်းအောက်မေ့လို့ သူ့အားကိုးနဲ့ ခေါ်လာမိပါတယ်။ ခင်ဗျား … ရည်းစား၊ အဲ … ရည်းစားလည်း မဟုတ်သေးပါဘူးလေ။ ခင်ဗျားဘက်က တဖက်သတ် ကြိုက်နေတဲ့ ကောင်မလေး။ အဲဒါ … ခင်ဗျား ကျုပ်ကို အဖော်ခေါ်ပြီး သွားမလို့မို့လား။ မရဘူး .. အခုပြန်လှည့်။ ခင်ဗျားဗျာ ဖြစ်မှဖြစ်ရပလေ‛
ကျနော်က ပြောပြောဆိုဆို နောက်ကိုပြန်လှည့်၏။ မိုင်အိုက်ပုံးက ရှေ့ဆက်သွားရမလို လုပ်နေသေး၏။ ပြီးတော့မှ ကျနော့်နောက်မှ မလိုက်ချင်လိုက်ချင်နှင့် ပြန်လိုက်လာ၏။ နာရီကိုကြည့်တော့ မွန်းတည့် ၁၂ နာရီရှိပြီ။ ကျနော်က နာရီကိုကြည့်ကာ မချိတင်ကဲ ဆုံးဖြတ်ချက်ချလိုက်ရတော့သည်။
‘ကဲ … ဒီအတိုင်းဆိုရင် မာနယ်ပလောကို ပြန်သွားရမှာရယ်၊ ဟိုကျတော့ ဓာတ်ပုံရိုက်ဖို့ နေရာရွေးရမှာရယ်ဆိုရင် အနည်းဆုံး တနာရီလောက်တော့ အချိန်ယူရမှာ သေချာတယ်။ ကျုပ် … ဒီလိုစဉ်းစားတယ်။ မနက်ဖြန်ကျမှ တခါထပ်ပြီး ကြိုးစားတော့မယ်။ ပြန်ဆင်းကြရအောင်။ နေစောင်းမှ ဓာတ်ပုံသွားရိုက်ရင် ကျုပ်တို့ လှမ်းအပစ်ခံရမှာ သေချာတယ်‛
ကျနော်က ပြောပြောဆိုဆို လာလမ်းအတိုင်းပြန်လျှောက်တော့ မိုင်အိုက်ပုံးက အင်တင်တင်လုပ်နေ၏။
‘ဒါဆိုရင် … ဒီလိုလုပ်မယ်။ ကျုပ်ကတော့ လာလက်စနဲ့ မထူးဘူး။ မယ်ပေါထ ဆက်ဒိုးလိုက်တော့မယ်။ ခင်ဗျား … ဒီလမ်းအတိုင်းသာ ဆင်းသွား။ ပဟေလူကို ဆင်းသွားမှာပဲ။ မှားစရာ အကြောင်းမရှိဘူး‛
‘ကြည့်စမ်း။ ဒီလောက် လူတွေထွက်ပြေးနေရတဲ့ကြားထဲ လူမရှိတော့တဲ့ရွာကို ခင်ဗျား ဘာသွားလုပ်ဦးမှာလဲ။ ဟိုမှာ … လူမပြောနဲ့ ခွေးတကောင် အကောင်တမြီးမှ မရှိတော့ဘူးဗျ။ မရဘူး။ ကျုပ်နဲ့ပဲ တခါထဲပြန်ရမယ်။ ဘယ့်နှယ်ဗျာ၊ ဒီလောက် တိုက်ပွဲဖြစ်၊ ဒီလောက် လူတွေ ကစင့်ကလျား ဖြစ်နေတဲ့ကြားထဲကများ။ ပြီးတော့ ကျုပ်တယောက်ထဲတော့ မပြန်ရဲဘူး။ လာ … အတူတူပဲပြန်မယ်‛
ကျနော်တို့နှစ်ယောက် ဖွေးပေါလူရွာကိုရောက်တော့ မိုင်အိုက်ပုံးက သူ့ကို မယ်ပေါထရွာ သွားခွင့် မပေးရကောင်းလားဟု ပြုံးဖြဲဖြဲနှင့် အပြစ်တင်ရင်းက လူချင်းခွဲလိုက်ကြ၏။
(ခ)
‘မကူညီချင်လို့တော့ မဟုတ်ဘူး ကိုငြိမ်းဝေ။ မာနယ်ပလော ကျပြီးတာကလည်း ရက်ပိုင်းပဲ ရှိသေးတယ်။ ပြီးတော့ အဲဒီနေရာမှာ ကျုပ်တို့ကင်းတွေတောင် မရှိတော့ဘူး။ ရန်သူက ဒီဘက်ကမ်းကိုကူးပြီး သူတို့လုံခြုံရေးကို ချဲ့ထားတယ်လို့လည်း ကြားတယ်။ ဒါကြောင့်မို့ပါ‛
ဗိုလ်မှူးတူးတူးလေးက သူ့ရဲဘော်များနှင့် အလုပ်ရှုပ်နေသည့်ကြားက ကျနော့်ကို ဘေးတွင်ခေါ်ကာ ခတ်တိုးတိုး တားမြစ်နေ၏။ ကျနော်ကမူ လက်မလျှော့နိုင်ပါ။
‘ဗိုလ်မှူးပြောတာ ကျနော်သိပါတယ်။ ဒါပေမဲ့ ကျနော် ဓာတ်ပုံသွားရိုက်ရုံပါ။ ရိုက်ပြီးပြီးချင်း ချက်ချင်းပြန်လာမှာပါ။ ဗိုလ်မှူး ဒါတခုတော့ ကူညီပါဗျာ‛
၃-၄ ကြိမ်တားမြစ်လို့ မရသောအခါကျမှ ဗိုလ်မှူးတူးတူးလေးက ကျနော့်အတွက် ကရင်ရဲဘော် နှစ်ယောက်ကို လမ်းပြအဖြစ် စီစဉ်ပေးခဲ့၏။ ကရင်ရဲဘော်များမှာ မြန်မာစကားတတ်သဖြင့် အဆင်ပြေ၏။
အမှန်စင်စစ် ဒီကနေ့မနက် ခရီးထွက်ဖြစ်လျှင် သူလည်း လိုက်ဖြစ်အောင် လိုက်ပေးမည်ဟု မိုင်အိုက်ပုံးက မနေ့ညနေကတည်းက ကတိပေးထားပြီး ဖြစ်သည်။ ဒီကနေ့မနက် သူ့ဆီ ကျနော်သွားတော့ သူက အိပ်ယာက မထသေး။ မနေ့တုန်းက မယ်ပေါထရွာကို မျက်လုံးနှင့် မြင်လိုက်ရပြီးခါမှ မသွားလိုက်ရလေခြင်းဟုဆိုကာ ညက တညလုံး အရက်ထိုင်သောက်ခဲ့သဖြင့် မနက်ကျတော့ အိပ်ယာက မထနိုင်တော့။
စိတ်ပျက်ပျက်နှင့် လူ့ဘောင်သစ် ဒီမိုကရက်တစ်ပါတီက ရဲဘော်ဗညားထံ ကျနော် ထွက်လာခဲ့သည်။ သူ့ထံတွင် ကင်မရာကောင်းကောင်း တလုံးရှိသည်။ ကျနော့်တွင်ရှိသော ကင်မရာက အဝေးချိန်မှန်ဘီလူးမှာ အားနည်း၏။ ရဲဘော်ဗညားထံတွင်ရှိသည့် ကင်မရာက Green Novenber 32 မှ ကင်မရာဖြစ်သည်။ အဝေးချိန်မှန်ဘီလူးမှာ အားအလွန်ကောင်းသည်ကို ကျနော်သိသည်။ အစပိုင်းတွင် ကိုဗညားက သူပိုင်ပစ္စည်း မဟုတ်ဟုဆိုကာ ကျနော့်ကို မငှားနိုင်ဟု ငြင်းနေသေး၏။ ကျနော့်ရည်ရွယ်ချက် အမှန်ကို ပြောပြမှ ငှားမည်ဟု ဈေးဆစ်နေသေး၏။
ကျနော်က ကင်မရာ ငှားလို့ရနိုင်ရန် အမှန်အတိုင်း ဖွင့်ပြောတော့ ကျနော်သွားမည့်ခရီးတွင် သူလည်း လိုက်ခွင့်ပြုမှ ငှားမည်ဟု ထပ်ပြီး ဈေးဆစ်နေပြန်သည်။ မတတ်သာသည့်အဆုံး ကင်မရာလည်း ရ၊ အဖော်လည်း ရဟု သဘောထားကာ ကိုဗညား၏ တောင်းဆိုချက်ကို လက်ခံခဲ့ရ၏။ ကိုဗညားသည်လည်း ကျနော်နှင့် ရင်းနီးသူပင်။ နေ့တိုင်းလိုလို ထူးရာစိုး လက်ဖက်ရည်ဆိုင်တွင် အတူထိုင်ကာ စကားဝိုင်းဖွဲ့ခဲ့သူ ဖြစ်သည်။ ဤသို့ဖြင့် ပဟေလူရွာ နောက်ကြော တောင်ပေါ်ခရီးတွင် ကျနော်တို့အဖွဲ့၌ လူ ၄ ယောက် ဖြစ်လာခဲ့လေသည်။
‘ဘယ်လိုလဲ … ကိုငြိမ်း။ ငြိမ်လှချည်လား။ ဘာတွေ တွေးလာတာလဲဗျ‛
‘ဟိုရောက်ရင် ခင်ဗျား ကင်မရာနဲ့  ခင်ဗျားပဲ ရိုက်ဗျာ။ ကျနော်က ကျနော့်ကင်မရာနဲ့ပဲ ကျနော် ရိုက်မယ်‛
‘ရတယ်လေ။ ခင်ဗျားက ဒီခရီးမှာ စစ်ကြောင်းမှူးပဲဟာ‛
တနာရီခွဲသာသာတွင် ကျနော်တို့လူစု တောင်ပေါ်လူသွားလမ်းပေါ် ရောက်လာကြ၏။ နောက်ထပ် နာရီဝက်ခန့် ရှိသောအခါ မာနယ်ပလောဘက်သို့ ဆင်းသည့် တောင်ကြောအတိုင်း ဆင်းလာနိုင်ကြ၏။ လမ်းတွင် မည်သည့်အခက်အခဲမျှ မရှိခဲ့။ ကျနော်တို့လူစု တောင်ကြောအတိုင်း ဆင်းလာနေစဉ် မာနယ်ပလောကို ထင်ထင်ရှားရှားကြီးပင် မြင်နေကြရ၏။ သာသနာ့အလံတချို့ကို နေရာ ၁ဝ နေရာခန့်လောက်တွင် လှမ်းတွေ့ရ၏။ ဒီကေဘီအေ အလံများပင် ဖြစ်မည်ဟု ယူဆမိသည်။
ကျနော်တို့ ဆင်းချလာရာ တောင်ကြောနှင့် မျက်နှာချင်းဆိုင် သောင်ရင်းမြစ် တဖက်ကမ်းတွင် စောဘဦးကြီး စစ်ရေးပြကွင်းကို မြင်နေရ၏။ စောဘဦးကြီး ကျောက်တိုင်ကိုမူ မတွေ့ကြရ။ နဝတ စစ်တပ်က ဖျက်ဆီးလိုက်၍ပဲလား၊ သစ်ပင်များ ကွယ်နေလို့ပဲလား ကျနော် မသိ။ ကျနော်တို့ကို လမ်းပြလိုက်ပါလာသူ ကရင်ရဲဘော် နှစ်ဦးကမူ အောက်ခြေနားအထိ ဆင်းလာကြသည့် ကျနော်တို့နှင့် ပါမလာတော့ဘဲ လမ်းတဝက်တွင်ပင် နေရစ်ခဲ့ကြ၏။ ကျနော်တို့ နှစ်ယောက်က ခြုံများ၊ သစ်ပင်များကို အကာအကွယ်ယူကာ တဖြေးဖြေးချင်း အောက်သို့ ဆင်းလာကြ၏။
‘ဟေ့ … ဟိုမှာ ဆရာတော်ရမ်ဘိုရဲ့ ကားမို့လား‛
တိုယုိတာ ဗင်ကားအဖြူလေးတစီးကို ဘုန်းတော်ကြီးကျောင်း ကမ်းပါးယံအောက်ခြေ၌ တွေ့ရ၏။ နဝတနှင့် ဒီကေဘီအေ တပ်များ သိမ်းဆည်းရမိသွားသော တစီးတည်းသော ကားလေးဖြစ်၏။ ဤကားလေးမှာ ဗိုလ်ချုပ်ကြီး စောဘိုမြက ဆရာတော် ရမ်ဘိုကို လှူဒါန်းထားသည့် ကားကလေးဖြစ်၏။
‘ဟိုမှာ … ကမ်းပါးယံမှာ စာလုံးတွေဖော်ပြီး ခင်းထားတယ်။ ဘာတဲ့ .. နဗဟ (၆၆၁)၊ ခမရ ၂၈ တဲ့။ ဟေ့ … ဟေ့ ကိုဗညားလေး ရိုက်ရိုက်။ သေသေချာချာ နှစ်ပုံသုံးပုံလောက်သာ ရိုက်‛
ကိုဗညားက အလံထောင်ထားသည်များကို ဓာတ်ပုံရိုက်နေရင်းက ကျနော်ပြောပြရာ ကမ်းပါးယံကို တဆက်တည်း ရိုက်၏။
‘ကြည့်စမ်း … ဒီကောင်တွေ မာနယ်ပလောကို သိမ်းတာ၊ သူတို့တပ်တွေ မဟုတ်ဘူး။ ဒီကေဘီအေ ကပဲ သိမ်းတာဆိုပြီး ညကပဲ သတင်းစာရှင်းလင်းပွဲမှာ ပြောသွားသေးတယ်။ ဟင်း … အခုတော့ သူတို့ကိုယ်တိုင် ဝင်သိမ်းတာ၊ ရှင်းနေတာပဲဟာ‛
‘ကဲ … ကိုဗညားရေ။ ဟိုဘက် ကျုပ်တို့ရုံးတွေဘက် အချိန်ရှိတုန်း ရွှေ့ကြဦးစို့။ ဒီဘက်က ဒီလောက်ဆို တော်လောက်ပါပြီ‛
ကျနော်တို့လူစု မာနယ်ပလော၏ တောင်ဘက်ကို ရွှေ့လာခဲ့ကြ၏။ ကျနော်ကတော့ မာနယ်ပလောကို လွမ်းသစွာ ငေးကြည့်ရင်း ရင်ထဲ၌ နာကျင်နေခဲ့၏။ ဤနေရာ၌ ကျနော်သည် ၃ နှစ်ကျော်မျှ နေထိုင်ခဲ့၏။ ယခုအခါ မာနယ်ပလော မြေပေါ်တွင် နဝတ စစ်သားတချို့ကို ဟိုဒီသွားလာနေသည်ကို မြင်နေရပြန်သည်။ ဆရာတော် ရမ်ဘို၏ ကားအဖြူလေးကိုလည်း ဟ်ိုဒီလျှောက်မောင်းနေသည်ကို တွေ့နေရ၏။ နဝတ စစ်သားများ ဖွင့်ထားသည့် ကက်ဆက်သီချင်းသံကိုပင် ကြားနေရ၏။ နဝတ စစ်သားအချင်းချင်း အော်ဟစ်ပြောဆိုသည့် အသံကိုပင်လျှင် သဲ့သဲ့မျှ ကြားနေရ၏။
‘ကဲ … ဘယ်လိုလဲ၊ ပြန်ကြမလား။ တခြားရိုက်စရာ နေရာ ရှိဦးမလား‛။ ကျနော်က ခေတ္တခဏမျှ စဉ်းစားနေလိုက်၏။
‘အခု အချိန်နည်းနည်း ရှိနေသေးတယ် ငါ့ညီ။ ငါတော့ အရင်နေရာကိုပဲ ထပ်ပြီး သွားကြည့်ချင်သေးတယ်။ ဘယ်နှယ့်လဲ‛
‘ဟာ … ဒါက ကိုငြိမ်း သဘောပဲလေ။ ကိုင်း … ကြာသလားလို့၊ ရွှေ့ကြရအောင်‛
ပထမ ကျနော်တို့ နေရာယူခဲ့ရာ နေရာသို့ ပြန်ရောက်လာကြပြန်သည်။ ကျနော်တို့လူသိုက် သတိကြီးစွာထားကာ၊ သစ်ပင်ခြုံပင်များကို အကာအကွယ်ယူကာ အောက်ဘက်ဆီ ဆင်းလာနေခိုက် အောက်တည့်တည့် သောင်ရင်းမြစ် ဒီဘက်ကမ်းတွင် လှေငယ်တစင်း ဆိုက်ထားသည်ကို တွေ့လိုက်ရ၏။ ကျနော်တို့က ရောက်ရာနေရာတွင်ပင် ရပ်ကာ အခြေအနေကို စောင့်ကြည့်ကြ၏။ အသံကို နားစွင့်၏။ နားထဲတွင် လေတိုးသံမှအပ ထူးခြားသည့်အသံကိုမူ မကြားကြရ။
သို့သော် ဟိုဘက်ကမ်း မာနယ်ပလော စက်လှေဆိပ်ဆီက အဝတ်ဖွပ်သည့် အသံကိုမူ အတိုင်းသားကြားနေရ၏။ ကရင်ရဲဘော် နှစ်ဦးက အောက်အထိ ဆက်ပြီးဆင်းရန် ချီတုံချတုံ ဖြစ်နေ၏။ ကျနော့်စိတ်ထဲတွင် သံသယစိတ် အနည်းငယ်ဖြစ်လာ၏။ ကျနော်တို့ ခရီးမထွက်လာခင်က ဗိုလ်မှူးတူးတူးလေး ပြောလိုက်သည့်စကားကို ကျနော် ပြန်စဉ်းစား၏။ ရန်သူက ဒီဘက်ကမ်းတောင်ကြောမှာ ကင်းတွေတက်ပြီး ထိုးကောင်းထိုးထားနိုင်သည်။ စစ်ခွေးဟောင်သံတွေလည်း ကြားရသည် ဟူသည့်စကားကို ပြန်တွေးမိကာ စိုးရိမ်လိုက်မိသေး၏။
‘ဒီလိုလုပ်။ ခင်ဗျားတို့က ဒီနားမှာပဲ စောင့်နေခဲ့ပေါ့ဗျာ။ ကျုပ်တို့ နှစ်ယောက်က အောက်နားအထိ နည်းနည်းဆင်းပြီး ဓာတ်ပုံရိုက်လိုက်ဦးမယ်‛
ကျနော်နှင့် ကိုဗညားက သတိနှင့် အောက်ကို ဆင်းလာခဲ့ကြသည်။
‘ဟော … ကိုငြိမ်းဝေ။ ဟိုမှာကြည့်စမ်း။ ခုနတုန်းက ကျုပ်တို့ တွေ့ခဲ့တဲ့စာတွေ မရှိတော့ဘူးဗျ။ ဟော … ဘာတဲ့။ ဒီကေဘီအေ ဆိုပြီး စာလုံးတွေ ပြောင်းသွားပြီဗျ‛
ကျနော်တို့နှစ်ယောက် ပြိုင်တူဆိုသလို ဘုန်းတော်ကြီးကျောင်း ကမ်းပါးယံကို ကင်မရာကိုယ်စီ ထိုးချိန်လိုက်ကြ၏။
လွန်ခဲ့သည့် တနာရီခန့်က ဤကမ်းပါးယံကြီးပေါ်တွင် ကျောက်တုံးများကို ထုံးဖြူသုပ်ကာ စာလုံးဖော်ထားသည့် နဗဟ (၆၆၁)၊ ခမရ ၂၈ စာတန်း၏ နေရာတွင် ဒီကေဘီအေ ဟူသော စာတန်းကြီးကို အံ့သြစွာ ဓာတ်ပုံရိုက်၏။ အမှန်တကယ်အားဖြင့်ဆိုလျှင် မာနယ်ပလောကို နဝတ စစ်တပ်များကသာ ဦးဆောင်ပြီး သိမ်းပိုက်ခဲ့ခြင်း ဖြစ်၏။ ထို့ကြောင့် စခန်းသိမ်းတပ်၏ နာမည်ကို စာလုံးဖော်၍ ဖော်ပြထားခဲ့ကြခြင်း ဖြစ်သည်။ သို့သော် လွန်ခဲ့သည့် ညကမူ စစ်အစိုးရက ပြုလုပ်သည့် သတင်းစာရှင်းလင်းပွဲ၌ မာနယ်ပလောကို ဒီကေဘီအေ တပ်များကသာ သိမ်းခြင်းဖြစ်ကြောင်း အသံလွှင့်ခဲ့၏။ ထို့ကြောင့် ဒီကနေ့ နံနက်ခင်းတွင် စာလုံးများ ပြောင်းပစ်လိုက်ကြ၏။ ကျနော်တို့က စာလုံးနှစ်မျိုးစလုံး၏ ဓာတ်ပုံများကို ကံအားလျော်စွာ တိုက်တိုက်ဆိုင်ဆိုင် အချိန်မီရလိုက်ကြခြင်း ဖြစ်လေသည်။
‘ကဲ … ကိုဗညား။ မောင်ရင်က ဒီမှာပဲနေပြီး ရိုက်တော့။ ကျုပ် ကင်မရာက အောက်နည်းနည်း ထပ်ဆင်းပြီး ရိုက်မှ အဆင်ပြေမှာ‛
ဝါးတရိုက်ခန့်အထိအောက်ကို ကျနော် ဆင်းလိုက်သည်။ စောဘဦးကြီး စစ်ရေးပြကွင်းကို အတိုင်းသား မြင်နေရ၏။ စစ်သားတချို့ အဆောက်အဦးပျက်များကြား သွားနေသည်ကို အရုပ်ကလေးများ လှုပ်ရှားနေသည့်သဖွယ် တွေ့နေရ၏။ ထိုစဉ်မှာပင် ခွေးဟောင်သံကြီးတသံကို ကျနော်နှင့် လက်တကမ်းအကွာခန့်က မမျှော်လင့်ဘဲ ကြားလိုက်ရလေသည်။ ချက်ချင်းဆိုသလို လာလမ်းအတိုင်း ကျနော် ပြန်ပြေးနေမိသည်။ ပြေးနေတက်နေရင်းက နောက်ဆက်တွဲ ကြားရဖွယ်ရှိသည့် ခွေးဟောင်သံနှင့် သေနတ်သံများကိုလည်း နားစွင့်နေရသေး၏။ သို့သော် ဘာသံမျှတော့ မကြားရ။ အားသွန်ပြီး တောင်ပေါ်ကို အပြေးတက်နေစဉ် အဖော်များကိုလည်း အပြစ်တင်မိသည်။ သူတို့သည် ကျနော့်ကိုပင် မစောင့်တော့ဘဲ တောင်ပေါ်ကို ပြေးနှင့်ကြပြီ ဖြစ်သည်။ သူတို့ကို အရိပ်အရောင်မျှပင် မတွေ့ရတော့။
ပြေးရင်းနှင့် စဉ်းစားသည်။ သည်အတိုင်း လူသွားလမ်းအတိုင်း ပြေးနေပါက နောက်က စစ်ခွေး လိုက်လာခဲ့သည်ရှိသော် လွတ်စရာ အကြောင်းမရှိသည်ကို တွေးမိလာသည်။ ကျနော်ကြည့်ဖူးသည့် ရုပ်ရှင်ကားများထဲ၌ စစ်ခွေးကြီးများ အလိုက်ခံရသည့်အခါ အနံ့ခံပြီးမှသာ လိုက်၏။ အလိုက်ခံရသည့် ဇာတ်လိုက်က စမ်းချောင်းအတိုင်း မျှောကူးပြီး သွားသောအခါ စစ်ခွေးများအဖို့ အနံ့ခံ၍ မရနိုင်တော့သည်ကို ပြေးရင်းလွှားရင်း တွေးမိလာ၏။ ထို့ကြောင့် လူသွားလမ်းလေးအတိုင်း မပြေးတော့ဘဲ အနိမ့်ပိုင်းချောက်ထဲသို့ ဆင်းချလာခဲ့၏။
အလဲလဲအပြိုပြိုနှင့် ဆင်းချလာနေစဉ် ကျနော့်မှာ ဆက်ပြီး မဆင်းနိုင်လောက်အောင် အမောဆို့လာရ၏။ အချိန်အတန်ကြာသည်အထိ ဒလိမ့်ခေါက်ကွေး ဆင်းချလာနေသည့်တိုင် ရေရှိသည့် စမ်းချောင်းကိုမူ အရိပ်အရောင်မျှ မတွေ့ရသေး။ ကျနော် မည်သို့မျှ မတတ်နိုင်တော့ပါ။ ထို့ကြောင့် ပြေးလို့မလွတ်လို့ သေချင်လည်း သေစေတော့ဟု ဆုံးဖြတ်ကာ သစ်ပင်တပင်၏ ခြေရင်းတွင် ပစ်လှဲချလိုက်ရ၏။ အသက်ကို ဖားဖိုထိုးသလို လေကိုရှူရှိုက်ရင်း ခွေးဟောင်သံ လူသံများကို နားစွင့်နေမိသေး၏။ သို့သော် တောကြီးတခုလုံး ကျနော့်အသက်ရှူသံများမှအပ မည်သည့်အသံမျှ မကြားရ။ သစ်ရွက်များ လေတိုးသည့် အသံများကို ကြားလိုက်ရ၏။
မိနစ်အနည်းငယ်မျှ နားပြီးမှ ကွဲသွားသည့် အဖော်များကို ကျနော် ရှာတွေ့မှ ဖြစ်မည်ကို တွေးမိလာသည်။ ကျနော် တောင်ပေါ်က ပြန်ဆင်းသည့် လမ်းမှန်ကို မသ်ိ။ အမော မပြည့်တပြေတွင် ခေါင်းပေါ်က တောင်စောင်းပေါ် ပြန်တက်ရပြန်သည်။ တောင်ထိပ်သို့ ရောက်လျှင် ခပ်မြင့်မြင့် သစ်ပင်တပင်ကို ရှာရမည်။ သစ်ပင်ပေါ်ကတဆင့် ပဟေလူနှင့် ဖွေးဘောလူရွာများ ရှိရာဘက်ကို ကြည့်မည်။ တွေ့လျှင် စိတ်မှန်းနှင့် တောင်ပေါ်က လမ်းရှာပြီး ဆင်းမည်ဟု စိတ်ကူးထားလိုက်၏။
တောင်ပေါ်လမ်းလေးပေါ် ကျနော် ရောက်လာခဲ့ပြန်သည်။ လမ်းတွေ့သဖြင့် ကျနော့်မှာ ခလေးတယောက်လိုပင် ပျော်ရွှင်သွားရ၏။ ခပ်မြင့်မြင့် သစ်ပင်တပင်ကို လိုက်ကြည့်နေစဉ် လူသံကြားရသဖြင့် လှမ်းကြည့်တော့ လူသွားလမ်းချိုးလေးဆီမှ လူနှစ်ယောက် ပေါ်လာခဲ့၏။
‘ဟာ … ခင်ဗျားတို့ပဲ။ ခင်ဗျားတို့ဗျာ၊ ကျုပ်တောင်မှ မစောင့်ကြဘူး။ ကျုပ်လည်း အသားကုန်ပြေးလိုက်ရတာ။ လူချင်း ပြန်တွေ့လို့ တော်သေးတာပေါ့။ နို့မို့ဆို ကျုပ်တယောက်ထဲ တောင်ပေါ်တောထဲ ဒုက္ခဖြစ်မှာသေချာတယ်‛
လမ်းပြ ကရင်ရဲဘော်နှစ်ဦးက ကျနော့်ကို မဝေခွဲတတ်သည့် မျက်လုံးကိုယ်စီနှင့် ကြည့်သည်။ ပြီးတော့ သူတို့အချင်းချင်းလည်း ကြည့်လိုက်ကြသေး၏။
‘ခင်ဗျား … တောင်ပေါ်တက်ပြေးတာ ကျနော်တို့ တွေ့တာပဲ။ ကျနော်တို့က လှမ်းခေါ်မယ်တောင် လုပ်သေးတာ။ ခေါ်ချိန်တောင် မရလိုက်ဘူး။ တခါထဲ တောင်ပေါ် ဒမျောသောပါး ပြေးသွားတာ။ ကျနော်တို့ ရှေ့ကပဲ ခင်ဗျား ပြေးသွားတာပဲဟာ။ ကျနော်တောင် စဉ်းစားနေတာ၊ ဘာပြုလို့များ ဒီလူ ဒီလောက် အရေးတကြီး ပြေးသွားပါလိမ့်ပေါ့‛
‘ဘာ … ခင်ဗျားတို့ရော ပြေးကြတာပဲမို့လား။ ဟို … ဟို အယ်လ်ဇေးရှင်း ခွေးဟောင်တာ ခင်ဗျားတို့ မကြားလိုက်ဘူးလား‛
‘ဘယ်ကလာ ခွေးဟောင်ရမှာလဲ။ ချေတကောင် လန့်ပြီး၊ အော်ပြီး ခင်ဗျားဘေးနားကပဲ အနိမ့်ထဲ ခုန်ချလိုက်တာပဲဟာ‛
ကျနော့်ခန္ဓာကိုယ်မှာ နောက်သို့ အလိုလိုယိုင်သွားရ၏။ ကရင်ရဲဘော်နှစ်ဦး၏ မျက်နှာကိုလည်း မကြည့်ရဲတော့။ သူတို့ နှစ်ဦးကလည်း ကျနော့်အခြေအနေကို အကဲခတ်ကာ ဒီကိစ္စကို ထပ်ပြီးမဟတော့။
‘ခင်ဗျားနဲ့ ပါလာတဲ့ ခင်ဗျာ့ရဲဘော်လေးကတော့ ဖွေးပေါလူကို ပြန်သွားနှင့်ပြီ။ ကျုပ်တို့နှစ်ယောက် တောင်အောက် ရောက်ပြီးမှ ဗိုလ်မှူးက ခင်ဗျား ပါမလာဘူးဆိုရင် မဖြစ်ဘူး၊ သွားရှာဆိုလို့ ကျုပ်တို့ ပြန်တက်လာကြရတာ‛
ကျနော်က ကရင်ရဲဘော်နှစ်ဦး၏ စကားကို မျက်နှာလွှဲပြီး၊ ခေါင်းငုံ့ထားပြီးမှ နားထောင်သည်။ သူတို့ကို ကျနော် မျက်နှာချင်း မဆိုင်ဝံ့လောက်အောင် ရှက်နေမိသည်။ တောင်ခြေနားသို့ ရောက်သောအခါကျမှ ပင်ပန်းချိနဲ့စွာ လျှောက်လာရင်းက၊ ကရင်ရဲဘော်နှစ်ဦးကို လေသံပျော့ပျော့နှင့်ပင် ကျနော် နှုတ်ဆက်စကား ပြောမိတော့၏။
‘အေးဗျာ … အခုလို သက်စွန့်ဆံဖျားလိုက်ပြီး လမ်းပြကူညီတာ ကျနော် ကျေးဇူး တကယ်တင်ပါတယ်။ ဗိုလ်မှူးတူးတူးလေးကိုလည်း ပြောပြပါ။ သြော် … ဒါပေမဲ့ ချေဟောက်တာကို ခွေးဟောင်တဲ့အသံ အောက်မေ့ပြီး ကျနော် ထွက်ပြေးတာကိုတော့ မပြောလိုက်ပါနဲ့ဗျာ၊ နော ..‛
(ဂ)
အိပ်ယာထဲတွင် နှစ်ရက်မျှ နားနေခဲ့ရသည်။ တောင်ပေါ်တွင် ပြေးခဲ့လွှားခဲ့ရသည့် ဒဏ်ကြောင့် ကျနော့်မှာ နှစ်ရက်မျှ ဖျားနာခဲ့ရ၏။ သည်ကြားထဲ မာနယ်ပလောကို ရိုက်ခဲ့သည့် ဓာတ်ပုံများကို အချိန်မီ သတင်းနယ်ပယ်သို့ ရောက်စေရန် စိတ်စောနေမိသည်။ စစ်အစိုးရ၏ လိမ်ညာဝါဒဖြန့် သတင်းစာရှင်းလင်းပွဲကို ကျနော်တို့ ရခဲ့သော ဓာတ်ပုံများဖြင့် ပြန်လည်ချေပနိုင်လိမ့်မည်ဟု ကျနော် ယုံကြည်သည်။ သို့သော် နေ့စဉ် အဖျားက မကျနိုင်အောင် ဖြစ်နေသည်။ ကျနော့်စိတ်ထဲ မာနယ်ပလောကို စွန့်စွန့်စားစား သွားရောက်၍ ဓာတ်ပုံရိုက်ခဲ့သည့် အကြောင်းကို မိတ်ဆွေများကို ဂုဏ်ယူဝံ့ကြွားစွာ အာဘောင်အာရင်းသန်သန်နှင့် ပြောပြချင်နေသည်။ ဒီကြားထဲ ကိုဗညားလေး ကလည်း ကျနော့်ထံ ရောက်မလာခဲ့။ သူလည်း သူ့ပါတီကိစ္စများနှင့် အလုပ်ရှုပ်နေလိမ့်မည်ဟု ကျနော် တွေးမိသည်။
အိပ်ယာထဲမှ ထလာနိုင်ခဲ့ပြီ။ ဒီကနေ့ဆိုလျှင် တဲပေါ်ကပင် ဆင်းလာနိုင်ပြီ။ တဲပေါ်တွင် လူမမာလာမေးကြသည့် မိတ်ဆွေတချို့ ရောက်နေ၏။ အခုလို လူစုံချိန်တွင် ကိုဗညားလေးကို ကျနော် တောင့်တမိသည်။ ကျနော်တို့၏ မဟာစွန့်စားခန်းကြီးကို လူစုံချိန်တွင် သူနှင့်ကျနော် အားရပါးရ ဖောက်သည်ချရလျှင် ဘယ်လောက်ကောင်းမည်နည်းဟု ကျနော် တွေးမိသည်။
‘ဟော … ပြောရင်းဆိုရင်း ရဲဘော်ဗညားတောင် ရောက်လာပြီ‛
ကိုယ်လုံးကိုယ်ထည်သေးသေး၊ ပိန်လျလျ ခန္ဓာကိုယ်ပိုင်ရှင် ကိုဗညားက တဲရှေ့ မြေကွက်လပ်တွင် လာရပ်လိုက်သည်။ ကျနော့်ကိုတလှည့်၊ တဲပေါ်က ပရိသတ်ကိုတလှည့် ဟန်ပါပါ ကြည့်လိုက်သည်။ ရဲဘော်ဗညား၏ မျက်နှာထားက်ို ကြည့်ကာ ကျနော် ထိတ်လန့်တုန်လှုပ်သွားရသည်။
‘သတင်းထောက် ကိုငြိမ်းဝေ ဖျားလောက်အောင် ပင်ပန်းမယ်ဆိုရင်လည်း ပင်ပန်းလောက်တာပေါ့ဗျာ‛
ရဲဘော်ဗညားက ပြောလက်စ စကားကို တုံးတိတိရပ်ထားလိုက်၏။ သူ့အမူအယာ၊ သူ့စကား၊ လေသံကိုကြည့်ကာ ကျနော် ထိတ်လန့်သွားရသည်။ သဘောပေါက်သွားရသည်။ ကျနော့်မျက်လုံးတွေထဲက ထွက်လာသည့် ဒေါသမြားအစင်းစင်းသည် ရဲဘော်ဗညား၏ ရင်ကို ထုတ်ချင်းခတ်သွား၏။ ရဲဘော်ဗညား ဘာမျှ ဆက်ပြီး မပြောတော့ပါ။ သို့သော် တဲပေါ်မှ ထွက်ပေါ်လာသည့် ရယ်သံများကမူ ကျနော့်နှလုံးသားပေါ် လမ်းကြိတ်စက် နင်းသလို ဖြတ်နင်းမောင်းချသွားလေတော့၏။ ။
(ချစ်ခင်လေးစားအပ်တဲ့ မိုင်အိုက်ပုံးမှာ စစ်အစိုးရ အကျဉ်းထောင်အတွင်း ကျဆုံးသွားခဲ့ပါပြီ။ ချစ်ခင်ရတဲ့ ညီငယ် ရဲဘော်ဗညားမှာ ယခုအခါ သြစတြေးလျားနိုင်ငံတွင် နေထိုင်လျက် ရှိပါသည်။ ကျနော်တို့ ရိုက်ခဲ့သော ဓာတ်ပုံများကိုမူ ၁၉၉၅ ခုနှစ်အတွင်းက ထုတ်ဝေခဲ့သည် ခေတ်ပြိုင်ဂျာနယ်တွင် ဖော်ပြနိုင်ခဲ့ပါသည်။ ယခုအခါ ကျနော်တို့ထံတွင် လက်ခံမရှိတော့သဖြင့် ဓာတ်ပုံများတော့ ဤဝတ္ထုတိုနှင့်တွဲလျက် တပါတည်း မဖော်ပြနိုင်တော့ပါ။)
No comments:
Post a Comment