Friday, September 27, 2013

အစိုးရ၏ အရပ်ဖက်၊ တပ်ဖက်ခေါင်းဆောင်များနှင့် တွေ့ဆုံရန် ကေအဲန်ယူ ခရီးထွက်ခွာ

စက်တင်ဘာ ၂၆ရက်၊ ၂၀၁၃ခုနှစ်။ စဖန်းရှောင်း (ကေအိုင်စီ)

DSC_0254မြန်မာအစိုးရ၏ အုပ်ချုပ်ရေးနှင့် တပ်ဖက်ဆိုင်ရာ အကြီးအကဲများကို တွေ့ဆုံရန် ကရင်အမျိုးသားအစည်းအရုံး (ကေအဲန်ယူ) ဥက္ကဌ ဗိုလ်ချုပ်ကြီးစောမူတူးစေးဖိုး ဦးဆောင်သည့် ကိုယ်စားလှယ် (၉)ဦးသည် ထိုင်း-မြန်မာနယ်စပ်မှ ရန်ကုန်သို့ ယနေ့နံနက် ခရီးထွက်ခွါသွားခဲ့သည်။

ယခုခရီးသည် ရှေ့ဆက်မည့် နိုင်ငံရေးတွေ့ဆုံဆွေးနွေးမှုများအတွက် အဓိကဖြစ်သော အပစ်အခတ်ရပ်စဲရေး ကိစ္စများနှင့် ပတ် သက်၍ အလွတ်သဘောအနေဖြင့် သွားရောက်ဆွေးနွေးရန်ရှိသည်ဟု ကေအဲန်ယူ အထွေထွေအတွင်းရေးမှူး ပဒိုစောကွယ်ထူး ၀င်းက ကေအိုင်စီသို့ ပြောသည်။

“အခု ခရီးစဉ်အနေနဲ့ အစိုးရရဲ့ ငြိမ်းချမ်းရေးဖော်ဆောင်ရေးကော်မတီနဲ့ မြန်မာတပ်မတော်ရဲ့ ရာထူးအမြင့်ဆုံး ပုဂ္ဂိုလ်နဲ့ တွေ့ဆုံဖို့ ရှိတယ်။ သဘောတူညီချက် တစ်ခုခုရရှိဖို့အတွက် မဟုတ်ပါဘူး။ တပြည်လုံး အပစ်အခတ် ရပ်စဲရေးနဲ့ ပတ်သက်ပြီး ရှေ့တက် လှမ်းနိုင်နဲ့ အမြင်သဘောထားတွေကို အပြန်အလှန်ဆွေးနွေးသွားဖို့ပဲ ရှိပါတယ်။”ဟု ပဒိုစောကွယ်ထူးဝင်းက ပြောဆိုသည်။

အဆိုပါ ကေအဲန်ယူ ကိုယ်စားလှယ်အဖွဲ့သည် စက်တင်ဘာလ ၂၇မှ ၃၀ရက်နေ့အထိ ရန်ကုန်မြို့နှင့် နေပြည်တော်သို့ သွား ရောက်ရန်ရှိပြီး မြန်မာ့တပ်မတော်မှ ကာကွယ်ရေးဦးစီးချုပ် ဗိုလ်ချုပ်ကြီးမင်းအောင်လှိုင်နှင့် မြန်မာအစိုးရ၏ ငြိမ်းချမ်းရေးဖော် ဆောင်ရေးကော်မတီ(MPC) တာဝန်ရှိသူများကို တွေ့ဆုံဆွေးနွေးသွားမည်ဟု သိရသည်။

ခရီးစဉ်တွင် ကေအဲန်ယူ ဥက္ကဌ ဗိုလ်ချုပ်ကြီးစောမှုတူးစေးဖိုး၊ အထွေထွေအတွင်းရေးမှူးချုပ် ပဒိုကွယ်ထူးဝင်း၊ KNU/KNLA စစ်ဦးစီးချုပ်ဗိုလ်ချုပ်ကြီးစောဂျော်နီ၊ စစ်ထောက်ချုပ် ဒုဗိုလ်ချုပ်စောအိုင်းဇက်၊ ပဒိုစောတာဒိုမှူး၊ ပဒိုစောရွှေမောင်း အပါအ၀င် အဖွဲ့ဝင် (၉)ဦး လိုက်ပါသွားခြင်းဖြစ်သည်။

Wednesday, September 25, 2013

ဒုက္ခသည် အမျိုးသမီးတစ်ဦး မယ်လစခန်းပြင်ပတွင် ဒဏ်ရာများဖြင့် သေဆုံး

စက်တင်ဘာလ ၂၅ရက်၊ ၂၀၁၃ခုနှစ်။ စောခါးစူးညား (ကေအိုင်စီ)

ထိုင်း-မြန်မာနယ်စပ် တာ့ခ်ခရိုင်အတွင်းရှိ မယ်လဒုက္ခသည်စခန်း (ဇုံ-စီ)အနီးအနားရှိ သစ်တောနေရာတစ်ခုတွင် ဒဏ်ရာများဖြင့် သေဆုံးနေသော ဒုက္ခသည် အမျိုးသမီးတစ်ဦး၏ အလောင်းကို တွေ့ရှိခဲ့ရကြောင်း မယ်လစခန်းတာဝန်ရှိသူများက ပြောသည်။

သေဆုံးသွားသည့် အမျိုးသမီးသည် အသက် ၃၇နှစ်အရွယ် မယ်လစခန်း ဇုံ-ဘီ၊ ရပ်ကွက်(၂)နေ နော်စိန်လှအေးဖြစ်ပြီး စက် တင်ဘာလ ၂၃ရက်နေ့က ပျောက်ဆုံးကာ ယနေ့နံနက် ၇နာရီအချိန်တွင် သူမ၏အလောင်းကို ပြန်လည်တွေ့ရှိခဲ့ခြင်းဖြစ်သည်ဟု မယ်လစခန်း ဥက္ကဌ စောအောနက်က ကေအိုင်စီသို့ ပြောသည်။

“သူ(မ) ဘယ်လိုကြောင့် ဒီလိုသေလဲဆိုတာ အခုထိ ဘယ်သူမှ မသိကြဘူး။ အလောင်းကို ပြန်တွေ့တဲ့အခါ ကိုယ်ပေါ်မှာ ထမီက ခါးအထိလှန်ထားသလို အပေါ်ပိုင်းမှာ အောက်ခံအင်္ကျီပဲ ရှိတယ်။ သူ့လည်ပင်းလည်း ကျိုးသွားတာကို တွေ့ရတယ်။ နောက် ကိုယ်မှာလည်း ဒဏ်ရာအညိုကွက်တွေ တွေ့ရတယ်။”ဟု ပြောဆိုသည်။

လက်ရှိတွင် ထိုင်းလုံခြုံရေး တာဝန်ရှိသူများက သေဆုံးသူ နော်စိန်လှအေးကို စစ်ဆေးမှုများ ပြုလုပ်ရာတွင် ထိခိုက်ဒဏ်ရာများ တွေ့ရှိရသော်လည်း တစုံတရာ အရေးယူ ဆောင်ရွက်မှုများပြုလုပ်ရန် ခက်ခဲနေသောကြောင့် သူမ၏အလောင်းကို မယ်လစခန်း ဇုံ-ဘီရှိ ကိုယ်ဝန်ဆောင်အမျိုးသမီး ဆေးခန်းအနီး ဇရပ်တွင် ထားရှိသည်ဟု သိရသည်။

ဇုံ-ဘီ၊ ရပ်ကွက်(၂)မှူး စောအဟွယ်က “ကျနော့်မျက်စိနဲ့ သူ့(မ)အလောင်းကို မြင်တာတော့ ပုံမှန်အနေအထား မဟုတ်ဘူး။ ဒါပေမယ့် သက်သေမရှိတဲ့အခါကျတော့ ခက်တယ်။ အခု အဲဒီဇရပ်မှာ ထားထားပါတယ်။ ဒီညနေ ၂နာရီကျော်မှာ မီးသင်္ဂြိုလ် မယ်”ဟု ကေအိုင်စီသို့ ပြောသည်။

သေဆုံးသွားသူသည် ထူးခြားသည့် ရောဂါတမျိုး စွဲကပ်နေပြီး ယင်းဝေဒနာမှာ တနှစ်လျှင် နှစ်ကြိမ်အထိ ဖြစ်ပွားကြောင်းနှင့် ရောဂါဖြစ်လာပါက ဦးတည်ရာ သွားလာတတ်ကြောင်း အိမ်းနီးချင်းများက ပြောဆိုသည်။ သေဆုံးသွားသူ နော်စိန်လှအေးမှာ ခင်ပွန်းဖြစ်သူ ကွယ်လွန်ခဲ့ပြီး ယခု အသက် ၁၂နှစ်အရွယ် သမီးတစ်ဦးနှင့် ၉နှစ်သားအရွယ် သားယောက်ျားလေးတစ်ဦး ကျန် ရစ်ခဲ့သည်။

ဒုက္ခသည်ဦးရေ လေးသောင်းကျော်ရှိသည့် မယ်လဒုက္ခသည်စခန်းတွင် ယခင်က အမျိုးသမီးများ စခန်းပြင်ပတွင် ကားတိုက်သေ ဆုံးမှုများရှိခဲ့ဖူးသလို အဓမ္မပြုကျင့်ခံရမှုများလည်း ရှိခဲ့ဖူးကြောင်း စခန်းတာဝန်ရှိသူများက ပြောဆိုသည်။