Wednesday, October 5, 2011
ဒုဋ္ဌ၀တီမြစ်ကူး မြစ်ငယ်တံတားကို အောက်တိုဘာလ ၄ ရက်နေ့ကတွေ့ရစဉ်
ကျောက်ဆည်ခရိုင်အတွင်း ရေကြီးရေလျှံမှုများ
ဆက်တိုက်ဖြစ်ပေါ်နေ
Wednesday, 05 October 2011ဆက်တိုက်ဖြစ်ပေါ်နေ
မန္တလေးတိုင်းဒေသကြီး ကျောက်ဆည်ခရိုင် အတွင်း အောက်တိုဘာလ ၃ ရက်နေ့မှစတင်ကာ ရေကြီးရေလျှံမှု များ ဆက်တိုက် ဖြစ်ပေါ်လျက်ရှိ ကြောင်း သတင်းရရှိသည်။
စက်တင်ဘာလ နောက်ဆုံးပတ်မှ စတင်၍ ဆက်တိုက်မိုးရွာသွန်းနေခြင်း ကြောင့် ကျောက်ဆည်ခရိုင်အတွင်း စီးဆင်းနေသည့် မြစ်ချောင်းများ၊ တူးမြောင်းများနှင့် ဆည်များအတွင်း၌ ရေပြည့်လျှံနေချိန်တွင် အောက်တိုဘာ ၂ ရက်နေ့ညမှ စတင်ကာ ညလုံးပေါက် မိုး အဆက်မပြတ် ထပ်မံရွာသွန်းခဲ့ရာ ကျောက်ဆည်မြို့နယ်၊ မြစ်သားမြို့နယ်၊ တံတားဦးမြို့နယ်၊ စဥ့်ကိုင် မြို့နယ်များတွင် ရေကြီးရေလျှံမှုများ ဖြစ်ပေါ်နေပြီး အထူးသဖြင့် ကျောက်ဆည်မြို့နယ်နှင့် မြစ်သားမြို့နယ်များ တွင် ရေကြီးရေလျှံမှုများ ပိုမိုဖြစ်ပေါ်နေကြောင်း သိရှိရသည်။
“မြစ်သားမြို့အနီးမှာ ဖြတ်စီးတဲ့ ပန်းလောင်မြစ်ထဲမှာ စမာရေလွှဲဆည် ဆောက်ပြီးတဲ့အချိန်က စပြီး နှစ်တိုင်း မြစ်သားမြို့ဟာ ရေကြီးတော့တာပါပဲ။ ၂၀၀၆ ခုနှစ်တုန်းကဆိုရင် ပန်းလောင်ဆည်ပါ ဖောက်ချရလိုက်တဲ့ အတွက် မြစ်သားမြို့မှာ ဆိုးဆိုးရွားရွား ရေလွှမ်းမှုဖြစ်ခဲ့တယ်။ အခုလည်း မြို့မှာ တဖြည်းဖြည်း ရေမြုပ်လာလို့ အနိမ့်ပိုင်း ရပ်ကွက်ကလူတွေ ရေလွတ်ရာကို ပစ္စည်းရွှေ့တဲ့သူကရွှေ့၊ ပြောင်းတဲ့သူကပြောင်း လုပ်နေကြပြီ”ဟု မြို့ခံ တစ်ဦးက ပြောသည်။
ယင်းသို့ မကြာခဏ ရေလွှမ်းမိုးမှု များကြောင့် မြစ်သားမြို့နယ်အတွင်း စိုက်ပျိုးထားသော ကြက်သွန်ခင်းများ၊ စပါးခင်းများ၊ ဥယျာဉ်ခြံများ ပျက်စီးဆုံးရှုံးမှုများ ဖြစ်ပေါ်ခဲ့သည်ဟု ဒေသခံများ၏ ပြောကြားချက်အရ သိရသည်။
“သြဂုတ်လ တုန်းကလည်း မြစ်သားမှာ ရေတစ်ကြိမ် ကြီးခဲ့ပါသေးတယ်။ အဲဒီတုန်းက ကြက်သွန်ခင်းတွေ အကုန်ရေနစ်ပျက်စီးခဲ့လို့ ဒုတိယအကြိမ် ပြန်စိုက်ထားတာ အခုနောက်ထပ်တစ်ခါ ရေမြုပ်ပြန်ပြီ။ ဒီလိုမိုးရွာတိုင်း ပျက်နေမယ်ဆိုရင် တောင်သူတွေဟာ ကြက်သွန်စိုက်ရင် ကျွန်သက်ရှည်မယ် ဆိုတာလိုဖြစ်နေပြီ။ အခု မြစ်သားမြို့နယ်ထဲမှာရှိတဲ့ ကြက်သွန်ခင်း အကုန်လုံးနီးပါး ပျက်စီးသွားခဲ့ပါပြီ။ တောင်သူအနေနဲ့ နှစ်ကြိမ်ဆုံးရှုံးပြီးပြီ ဖြစ်လို့ ဘယ်လို့မှ မဖြစ်နိုင်တော့ပါဘူး။ စားဝတ်နေရေးကိုတောင် စိုးရိမ်ရတဲ့အနေ အထားပါ”ဟုမြစ်သားမြို့နယ်အတွင်း မှ ကြက်သွန်စိုက် တောင်သူတစ်ဦးက ပြောသည်။
ကျောက်ဆည်မြို့ရှိ ဆေးရုံမှလူနာတစ်ဦးအား ပြောင်းရွှေ့ပေးရန် ပြင်ဆင်နေသည်ကိုအောက်တိုဘာလ ၄ ရက်နေ့က တွေ့ရစဉ်
ကျောက်ဆည်မြို့တွင်လည်း ဇော်ဂျီမြစ်ရေလျှံမှုကြောင့် မြို့လယ်ရှိ ဇော်ဂျီမြစ်ဖြတ်တံတား ရေလွှမ်းမိုးခြင်း ခံနေရပြီး မြို့ပေါ်ရပ်ကွက်များနှင့် အနီးပတ်ဝန်းကျင်ရှိ ကျေးရွာများတွင် ရေနစ်မြုပ်လျက်ရှိကြောင်း သိရှိရသည်။
စဥ့်ကိုင်မြို့နယ်တွင်လည်း ပန်းလောင်မြစ်ရေကြောင့် ကျေးရွာအများစု ရေနစ်မြုပ်လျက်ရှိပြီး ဘဲလင်းကျေး ရွာအုပ်စုတွင် ပါဝင်သော ရွာနှစ်ရွာတွင် ရေလေးပေခန့် နစ်မြုပ်လျက်ရှိကြောင်း ကျေးရွာအုပ်ချုပ်ရေးမှူး၏ ပြောကြားချက်အရ သိရှိရသည်။
“ရေလွတ်ရာကိုရွှေ့ပြောင်းဖို့စီစဉ် ပေးနေပါတယ်။ မြို့နယ်ကျန်းမာရေး ဋ္ဌာနကလည်း ရေဘေးဒုက္ခသည်တွေ အတွက် လိုအပ်တဲ့ကျန်းမာရေးစောင့် ရှောက်မှုတွေ ပြုလုပ်ပေးဖို့ရောက်ရှိ နေကြပါတယ်”ဟု ဘဲလင်းကျေးရွာ အုပ်ချုပ်ရေးမှူးက ပြောကြားသည်။
ကျောက်ဆည်မြို့ ဇော်ဂျီမြစ်ကူးကြိုးတံတားကို အောက်တိုဘာလ ၄ ရက်နေ့က တွေ့ရစဉ်“အခု ရေနစ်မြုပ်နေတဲ့နေရာတွေ က ပုဂံခေတ်အနော်ရထာမင်းလက် ထက်ကတည်းက အကောင်အထည် ဖော်ခဲ့တဲ့ လယ်တွင်းကိုးခရိုင်ဒေသ ဖြစ်ပါတယ်။ ဒီဒေသမှာ ဧရာဝတီ၊ ဒုဋ္ဌ ၀တီ၊ ဇော်ဂျီ၊ ပန်းလောင်၊ စမုံ စတဲ့ မြစ်တွေစီးဆင်းနေကြပါတယ်။ ဒုဋ္ဌ ၀တီမြစ်မှာ ရဲရွာရေအားလျှပ်စစ်စက်ရုံ အတွက် ဆောက်ထားတဲ့ ရဲရွာဆည် ရှိပါတယ်။ ရာသီဥတုကလည်းတစ်နှစ် ထက်တစ်နှစ် ဖောက်ပြန်လာတော့ နှစ်တိုင်းလိုလို ရေမြုပ်နေတော့တာ ပါပဲ”ဟု မြစ်သားမြို့မှ ဒေသခံတစ်ဦး က ပြောကြားသည်။
မိုးလေ၀သနှင့် ဇလဗေဒညွှန် ကြားမှုဦးစီးဌာနမှ ထုတ်ပြန်ချက်များ အရ ပြီးခဲ့သော အောက်တိုဘာလ ၃ ရက်နေ့က ကျောက်ဆည်မြို့တွင် ရွာ သွန်းခဲ့သည့် မိုးရေချိန်မှာ ၇ ဒသမ ၅၁ လက်မရှိပြီး အနီးပတ်ဝန်းကျင် မြို့များဖြစ်သော မြစ်သားမြို့တွင် ၅ ဒသမ ၈ လက်မ၊ မန္တလေးမြို့တွင် ၄ ဒသမ ၄၁ လက်မနှင့် စစ်ကိုင်းမြို့ တွင် ၄ ဒသမ ၃၇ လက်မ ရှိကြောင်း သိရှိရသည်။
“၂၀၀၆ ခုနှစ်က ကျောက်ဆည်နဲ့ မြစ်သားဝန်းကျင်မှာ ရေကြီးခဲ့ဖူးတာ ထက် ဒီနှစ်ရေကြီးတာက ပိုဆိုးပါ တယ်။ ကျောက်ဆည်တင်မကဘဲ အနီးပတ်ဝန်းကျင် မြို့တွေပါ ရေကြီး နေတာဖြစ်လို့ တော်တော်နဲ့ရေပြန် မကျရင် နောက်ဆက်တွဲဖြစ်လာမယ့် အကျိုးဆက်တွေက ခန့်မှန်းလို့မရနိုင် ပါဘူး”ဟု မန္တလေးတိုင်းဒေသကြီး မိုးလေ၀သနှင့်ဇလဗေဒညွှန်ကြားမှု ဦးစီးဌာနမှ ၀န်းထမ်းတစ်ဦးက ပြော ကြားခဲ့ပါသည်။
No comments:
Post a Comment